ONGWEDIVA - Oshiwike shaantu mboka taya lumbu nuulema otashi dhimbulukiwa kaantu oyendji ya yooloka ya za kiitopolwa ya yi ili noyi ili, tashi dhimbululikwa mondoolopa yaNgwediva moshitopolwa shaShana, mehala Bennies Park.
Oshiwike shika ohashi dhimbulukwa omumvo kehe momwedhi gwaMaalitsa, nonuumvo otashi dhimbulukwa okuza momasiku 05-07 gaMaalitsa.
Nuumvo oshiwike shaanuulema moshilongo ashihe otashi dhimbulukwa kohi yoshipalanyolo “Innovative solutions towards the integration of national policies and strategies with the CRPD for the creation of a disability-inclusive and accessible society”. Esiku ndyoka ohali dhanwa kehe omvula okuyambula po aanuulema noku ya pa oompito dha yooloka okuholola omaiyuvo gawo, noku ya hololela esimano lyawo.
Ohaya dhimbulukwa wo oshiwike shoka okupewa omukumo nomayele oshowo okufatululilwa omawuthemba gawo, ngaashi okumona elongo, iilonga, iikulya nosho tuu. Aanuulema ye vule 200 ya za kiitopolwa ya yooloka, oya li ya thiki moshitopolwa shaShana okudhimbulukila oshiwike shawo pamwe.
Aanuulema oya li ya eta po iinyangadhalwa ya yooloka okuulika nkene ya taamba ko onkalo ya taalela. Omupeviminista gwaanuulema Alexia Manombe-Ncube, ngoka a popi kutya kakele kokudhimbulukwa ashike oshiwike shika, limwe lyomomalalakano gokudhimbulukwa oshiwike shika okutala konima ndele aantu taya tala kutya omashongo geni ya kala taya ungaunga nago noshowo shoka ya sindana musho momukokomoko ngoka.
“Oshigwana ashihe osha taalela omashongo ga yooloka, ihe shoka otwa pumbwa oku shi taamba ko ngaashi shi li,” ta kumagidha ngaaka. Manombe-Ncube okwa ti epangelo olya kala nokuyambidhidha aanuulema poompito odhindji.
Ta gwedha po kutya omahala noombelewa dhepangelo nenge dhoshigwana ngele otadhi longithwa kaantu ye na uulema nena shoka otashi toto po onkalo nomudhingoloko gu li nawa kaantu mboka, tashi ya kwathele nokuli opo ya iyuvithe nawa mopolitika, oohedhi nomuthigululwakalo noshowo uuthemba wonkalathano yaantu.